لغمان؛ علیشنګ ولسوالۍ کې د ۲۶ لوبډلو ترمنځ د والیبال سیالۍ پای ته ورسېدې
د لغمان ولایت د بدني روزنې او ورزش امریت اړوند د والیبال فدراسیون د استازولۍ له لوري د یاد ولایت په علیشنګ ولسوالۍ کې د ۲۶ لوبډلو ترمنځ د والیبال سیالۍ د علیشنګ مرکزي لوبډلې په اتلولي پای ته ورسېدې.
د یادو سیالیو پایلوبه کې علیشنګ مرکزي لوبډلې د ۰/۳ میدانونو په توپیر خپلې سیالې ګنجوړ لوبډلې ته ماتې ورکړه او د دغو سیالیو اتلولي یې وګټله.
دا سیالۍ ورزش ته د ځوانانو د هڅولو او له نشه یي توکو څخه د لیرې والي په موخه ترسره شوې، چې ۱۲ ورځې یې دوام وکړ.
