کونړ، په اسمار ولسوالۍ کې د ۲۰ لوبډلو ترمنځ د ټېپ بال کرکټ سيالۍ پای ته ورسېدې
د کونړ ولايت د بدني روزنې او ورزش امريت اړوند د ټېپ بال کرکټ فدراسيون د استازولۍ له لوري د اسمار ولسوالۍ په شنګر سيمه کې د ۲۰ لوبډلو ترمنځ د ټېپ بال کرکټ سيالۍ، چې نږدې يوه مياشت يې دوام وکړ پای ته ورسېدې.
د دغو سياليو پايلوبه د خانانو کڅ او شنګر شاهين لوبډلو ترمنځ وشوه، لومړی توپوهنه شنګر شاهين لوبډلې وکړه او په ټاکلو لسو اورونو کې يې سيالې لوبډلې ته ۱۲۰ منډې هدف کېښود، د لوبې په دويمه پاڼۍ کې خانانو کڅ لوبډلې ياد هدف د درېوو ویکټو په زيان پوره کړ او په اووه ویکټو يې اتلولي خپله کړه.
