کندهار کې د ٨٠ لوبډلو ترمنځ د فوټسال سیالۍ پای ته ورسېدې
د کندهار ولایت د بدني روزنې او ورزش ریاست اړوند د فوټبال فدراسیون د استازولۍ له لوري د ياد ولايت مرکز کندهار ښار کې د ٨٠ لوبډلو ترمنځ د فوټسال سیالۍ د ابراهیمي لوبډلې په اتلولي پای ته ورسېدې.
د یادو سیالیو پایلوبه د ابراهیمي او آرین لوبډلو ترمنځ ترسره شوه، چې لوبه په ټاکلي وخت کې د یو- یو ګول په وهلو سره مساوي شوه، خو په پنالټیو کې ابراهیمي لوبډلې د ۴/۳ ګولونو په توپیر خپلې سیالې لوبډلې ته ماتې ورکړه او اتلولي یې خپله کړه.
دا سیالۍ د ځوانانو لپاره د سالمې تفرېح په موخه ترسره شوې، چې درې مياشتې يې دوام وکړ.
