کاپیسا ؛ السای ولسوالۍ کې د اتو لوبډلو ترمنځ د ټېپ بال کرکټ سیالۍ پيل شوې
د کاپيسا ولایت د بدني روزنې او ورزش امریت له لوري د یاد ولایت د السای ولسوالۍ په نواباد ورزشي لوبغالي کې د اتو لوبډلو ترمنځ د ټېپ بال کرکټ دولس اوریزه ګروپي سیالۍ پيل شوې.
د دغو سیالیو په لومړۍ لوبه کې د السای ولسوالۍ منتخبې لوبډلې په ټاکلو دولس اورونو کې خپلې سیالې مرکزي السای لوبډلې ته د ۱۲۰ منډو هدف وټاکه، په مقابل کې مرکزي السای لوبډلې یاد هدف په یوولسم اور کې پوره کړ او لومړۍ بریا یې خپله کړه.
د یادو سیالیو موخه د ټېپ بال کرکټ ته وده ورکول او له نشه یې توکو د ځوانانو لېرې والی دی، چې ۲۰ ورځې به دوام وکړي.
