کاپیسا؛ د ۶۰ ورزشکارانو ترمنځ د کیک بکسنګ تشویقي سیالۍ ترسره شوې
د کاپیسا ولایت د بدني روزنې او ورزش آمریت په همکاري او د یاد ولایت د کیک بکسنګ فدراسیون د نمایندګي له لوري د کاپیسا ولایت له بېلابېلو کلبونو څخه په مختلفو وزنونو کې د ۶۰ ورزشکارانو ترمنځ د کیک بکسنګ تشویقي سیالۍ ترسره شوې.
یادې سیالۍ د نوموړي ولایت د ورزشي آمر، د کلبونو استادانو، ورزشکارانو او ګڼ شمېر مینوالو په حضور کې ترسره شوې.
د دغو سیالیو موخه ورزش ته د ځوانانو هڅول او د ورزشکارانو د ورزشي کچې لوړول ښودل شوي دي.
په پای کې د کاپیسا د ورزشي آمر له لوري غوره لوبغاړو ته تشویقي مډال، د اتلولي جام او ستاینلیکونه ورکړل شول.
