کابل کې په لومړي ځل ۵۰ غرختونکو ته د غرختنې ښوونيز کورس پيل شو
د المپيک، بدني روزنې او ورزش عمومي رياست په همغږۍ او د افغانستان او ايران د غرختنې ملي فدراسيونونو په مرسته د لومړي ځل لپاره ۵۰ غرختونکو ته د غرختنې علمي او منظم انلاين ښوونيز کورس پيل شو.
په دغه ښوونيز کورس کې له کابل، کندهار، باميان، بلخ، هرات، غور، غزني او بغلان ولايتونه غرختونکو ګډون کړی وو، چې د ایراني روزونکي له لوري ورته د غره ختلو په اصولو، نقشې لوستلو، د GPS وسیلو سره په کار کولو، لټون او ژغورنې، د غرونو طب، د واورې ښویدنې پیژندلو او له هغوی سره د چلند کولو، په غرونو کې د ژغورنې او مرستې او په تيږو د ختلو په اساساتو کې روزنه ورکول کیږي.
ياد ښوونيز کورس به په پیل کې د دوو میاشتو لپاره په نظري ډول ترسره شي، او له بشپړیدو وروسته به ایراني روزونکي د عملي او ساحوي روزنې لپاره د افغانستان یوه غرني ولایت ته واستول شي.
