کابل کې له ۲۰۰ څخه زیاتو پهلوانانو ترمنځ د زورخانهيي غېږنيونې سیالې پيل شوې
د کابل ولايت د بدني روزنې او ورزش ریاست سره په همغږۍ د زورخانه ورزشونو ملي فدراسیون له لوري د کابل ولایت د ۷ کلبونو څخه له ۲۰۰ څخه د زیاتو پهلوانانو ترمنځ د زورخانهيي غېږنيونې سیالۍ د ياد فدراسيون په جمنازيوم کې پيل شوې، چې د روانې میاشتې تر ۱۹ مې نیټې به دوام وکړي.
دغه سيالۍ، په دوه عمري کټګوريو نويو ځوانانو او ځوانانو کې د غوره څېرو موندلو په موخه پيل شوې، چې په پايله کې به يې غوره لوبغاړي د دې سياليو راتلونکو لوبو ته غوره شي.
د ويلو ده، چې د دې سياليو له پيل وړاندې د ياد فدراسيون د مسوولینو له لوري په دې سياليو کې برخه اخیستونکو ورزشکارانو ته د زورخانهيي غېږنيونې د اصولو او مقرراتو په اړه سمینار وړاندې شو.
