کابل کې د ۵۰ ورزشکارانو ترمنځ د کیک بوکسنګ څلورویشتم پړاو سیالۍ ترسره شوې
د المپیک، بدني روزنې او ورزش لوی ریاست اړوند د کیک بوکسنګ ملي فدراسیون له لوري د یاد ریاست په ۲۵۰۰ کسیز جمنازیوم کې د ۵۰ ورزشکارانو ترمنځ د کیک بوکسنګ څلورویشتم پړاو سیالۍ ترسره شوې.
دغه سیالۍ د ځوانانو او لویو ورزشکارانو په عمري کټګورۍ او د واکو کیک بوکسنګ، لوکیک کیک بوکسنګ او پروفشنل کیک بوکسنګ سبکونو کې د ورزشکارانو ترمنځ ترسره شوې.
دغو سیالیو ته د هېواد المپيک، بدني روزنې او ورزش لوی ریاست فني او مسلکي معاون حافظ احمد جان ځدراڼ، د یاد ریاست د دعوت او ارشاد رییس داد محمد بریال عطایي، کیک بوکسنګ ملي فدراسیون رهبري پلاوي، ورزشکاران او زیات شمېر مینوال راغلي وو.
په دغو سیالیو کې د بدني روزنې او ورزش لوی ریاست فني او مسلکي معاون حافظ احمدجان ځدراڼ ورزشکارانو ته د نېکمرغه لوی اختر مبارکۍ ورکولو ترڅنګ د لوی اختر په مناسبت د یادو سیالیو په ترسراوي خوشحالي څرګنده کړه او زیاته یې کړه: د هېواد ورزش اداره په همدې هڅه کې ده ترڅو د ورزشکارانو د ظرفیت د لوړولو او ودې په موخه دوی ته سیالۍ برابرې کړي.
نوموړي دغه راز وویل: زه شاهد یم، چې سږ کال په مرکز او ولایتونو کې د لوی اختر د لمانځلو په موخه د هېواد د ورزش ادارې له لورې په پراخ ډول او ګڼو سیمو کې دې ته ورته سیالۍ برابرې شوې وې او په خورا ښه ډول ترسره شوې.
د یادو سیالیو موخه د نېکمرغه لوی اختر نمانځل او د ورزشکارانو ظرفیت ته وده ورکول و.
