کابل کې د ۳۳۰ ورزشکارانو ترمنځ د ووشو ملي لوبډلې يوولسم پړاو ټاکنيزې سيالۍ پای ته ورسېدې
د المپيک، بدني روزنې او ورزش عمومي رياست اړوند د ووشو ملي فدراسيون له لوري د ياد رياست په ۲۵۰۰ کسيز جمنازيوم کې د هېواد له ۲۹ ولايتونو د ۳۳۰ ورزشکارانو ترمنځ د ووشو ملي لوبډلې يوولسم پړاو ټاکنيزې سيالۍ د غوره لوبغاړو په ټاکلو پای ته ورسېدې.
دغه سيالۍ د تنکيو ځوانانو، نويو ځوانانو، ځوانانو او د مشرانو ورزشکارانو په عمري کټګوريو او په ساندا او فورم سبک کې ترسره شوې، چې په پايله کې له هرې کټګورۍ ۳۰ ورزشکاران، چې ټول ۱۲۰ تنه ورزشکاران کېږي د هېواد ووشو ملي لوبډلې ته وټاکل شول.
همدارنګه د ولايتونو په کچه د کابل ولايت ورزشکارانو د زياتو امتيازونو په ترلاسه لومړی، د تخار ولايت ورزشکارانو دويم او د کندز ولايت ورزشکارانو بيا در ېيم مقام ترلاسه کړ.
د دغو سياليو د پای په مراسمو کې د المپيک، بدني روزنې او ورزش عمومي رييس مولوي احمد الله وثيق، د ياد رياست فني او مسلکي مرستيال حافظ احمد جان ځدراڼ، د ورزش ادارې مالي او اداري رييس عبدالناصر هاشمي، د يادې ادارې ورزشي مشاور قاري حيات الله رحماني، د المپيکي چارو رييس داد محمد پاينده اختري، د کابل ولايت د بدني روزنې او ورزش رييس مولوي عتيق الله خالد، د ياد رياست د دعوت او ارشاد رييس مولوي داد محمد بريال عطايي، د فني او مسلکي رياست سرپرست حميد الله صافي، د کورنيو چارو وزارت وياند مفتي عبدالمتين قانع، د اطلاعاتو او فرهنګ له وزارت مولوي عبدالحق حماد، د ووشو ملي فدراسيون رهبري، ورزشکارانو او زيات شمېر مينوالو ګډون کړی وو.
په دغو مراسمو کې د المپيک، بدني روزنې او ورزش عمومي رييس مولوي احمد الله وثيق ټاکل شوو ورزشکارانو ته مبارکي وويل او د دغه ډول ملي ټاکنيزو سياليو ترسره کېدل يو غوره اقدام وباله او زياته ېې کړه: د المپيک، بدني روزنې او ورزش عمومي رياست وياړي، چې په مرکز او ولایتونو کې دغه ډول ملي ټاکنيزې سيالۍ ترسره کېږي او د هېواد ورزش اداره د ورزشکارانو سره په ټولو برخو کې همکاره ده او په دې هڅه کې ده، چې ورزش د هېواد په ټولو برخو کې وده وکړي.
ورپسې د کورنيو چارو وزارت وياند او د ووشو ملي فدراسيون حقوقي مشاور مفتي عبدالمتين قانع په دغه ډول ملي ټاکنيزو سياليو کې د غوره او نويو لوبغاړو پيداکول وستايل او د ورزش ادارې له رهبري څخه يې مننه وکړه، چې د ورزشي فدراسينونو په ټولو برخو کې له دوی سره همکاري کوي.
په وروستيو کې د اطلاعاتو او کلتور له وزارت مولوي عبدالحق حماد د ورزش ادارې په وروستیو لاسته راوړنو خبرې وکړې او د اسلام مبارک دین په چوکاټ کې د ورزش ارزښت بيان کړ او همدارنګه د ورزش ادارې د رهبري هڅې يې يو نيک اقدام وباله.
د يادو سياليو موخه د هېواد ووشو ملي لوبډلې ته د غوره لوبغاړو موندل و، چې پنځه ورځې يې دوام وکړ، په پای کې د کابل ولايت لوبډلې ورزشکارانو په ساندا او فورم سبک کې د زياتو امتيازونو په ترلاسه د اتلولۍ کپ او غوره لوبغاړو ته چمتو شوې ډالۍ ورکړل شوې.
