کابل کې د ۳۲ لوبډلو ترمنځ د فوټبال اتلولۍ سیالۍ د کابل عیاران لوبډلې په اتلولۍ پای ته ورسېدې
د هېواد د المپيک، بدني روزنې او ورزش لوی ریاست اړوند د فوټبال فدراسیون د استازولۍ له لوري د ۳۲ لوبډلو ترمنځ له شل کلنو کم عمره د فوټبال اتلولۍ سیالۍ، چې یوه نیمه میاشت وړاندې د یاد ریاست په غازي سټیډیوم کې پيل شوې وې د کابل عیاران لوبډلې په اتلولۍ پای ته ورسېدې.
د دغو سیالیو په پایلوبه کې د کابل عیاران لوبډلې خپلې سیالې داوودزي لوبډلې ته د ۳/۲ امتیازونو په توپیر ماتې ورکړه او اتلولي یې خپله کړه.
د دغو سیالیو پایلوبې ته د هېواد فوټبال ملي فدراسیون رییس یوسف کاګر، د یاد فدراسیون د فوټسال کمېټې مسوولین، ورزشکاران او زیات شمېر مینوال راغلي وو.
د یادو سیالیو موخه د کابل ولایت منتخبې لوبډلې ته د غوره لوبغاړو موندل و.
د سیالیو په پای کې غوره لوبډلې ته د اتلولۍ جام او غوره ورزشکارانو ته چمتو شوې ډالۍ ورکړل شوې.
