کابل کې د ۱۱۶ ورزشکارانو ترمنځ د اول زون د سوک وهنې ټاکنیزې سیالۍ پیل شوې
د المپیک، بدني روزنې او ورزش عمومي ریاست اړوند د سوک وهنې ملي فدراسیون له لوري د یاد ریاست د سوک وهنې ورزشي جمنازیوم کې د کابل ښار له ۳۲ کلبونو د ۱۱۶ ورزشکارانو ترمنځ د اول زون د سوک وهنې ټاکنیزې سیالۍ پیل شوې.
دغه سیالۍ، چې د لویو ورزشکارانو په عمري کټګورۍ کې به ترسره شي، په پایله کې ۲۶ تنه ورزشکاران د اول زون د سوک وهنې منتخبې لوبډلې ته وټاکل شي.
د سوک وهنې ملي فدارسیون د مسوولینو په وینا دغه د زونونو ټاکنیزې سیالۍ به په منظم ډول ترسره شي او پنځلس ورځې به نور هم دوام وکړي، ترڅو د زونونو منتخبو لوبډلو ته غوره لوبغاړي پیداشي.
د دغو سیالیو د پیل مراسمو ته د المپیک، بدني روزنې او ورزش عمومي ریاست فني او مسلکي مرستیال حافظ احمدجان ځدراڼ، د سوک وهنې ملي فدراسیون رهبري پلاوي، ورزشکاران او زیات شمېر مینوال راغلي وو.
