کابل کې د ٧٤ ورزشکارانو ترمنځ د جمناستیک سیالۍ ترسره شوې
د المپیک، بدني روزنې او سپورټ لوی ریاست په همغږي او د جمناستیک ملي فدراسیون له لوري د ياد ریاست په پنځه سوه کسیز ورزشي جمنازیوم کې د ٧٤ ورزشکارانو ترمنځ د جمناستیک سیالۍ ترسره شوې.
يادې سیالۍ د تنکيو ځوانانو، نویو ځوانانو، ځوانانو او لویانو په عمري کټګوري کې ترسره شوې چې د تنکیو ځوانانو له کټګوري څخه شهیر، د نویو ځوانانو له کټګوري څخه احمد، د ځوانانو له کټګوري څخه حیدر او د لویانو له کټګوري څخه باسط د سرو زرو، یاسر، نعمت، اعجاز او سبحان الله د سپينو زرو او رحیم الله، سهراب، مصطفی او احمد سجاد په ترتیب سره د برنزو مډالونه وګټل.
د یادو سیالیو د نندارې لپاره د المپیک، بدني روزنې او سپورټ لوی ریاست فني او مسلکي مرستیال حافظ احمد جان ځدراڼ، د سياليو د برابرولو آمر عزیز الرحمن ملنګ، د دعوت او ارشاد رئیس مولوي بریال عطايي او د ورزش ګڼ مینوال راغلي وو.
دغه سيالۍ چې د نېکمرغه لوی اختر د نمانځلو په مناسبت ترسره شوې، په پای کې یې لومړي، دویم او درېیم مقام ګټونکو لوبغاړو ته کپونه، مډالونه او ستاینلیکونه ورکړل شول.
