کابل؛ د نړيوالو مدرسينو له لوري ۲۳ روزنکو ته د آسيا دويمه درجه فوټسال روزنيز کورس پای ته ورسېد
د آسيا دويمه درجه فوټسال روزنيز کورس، چې نهه ورځې مخکې د فوټبال فدراسيون له لوري او د المپيک، بدني روزنې او ورزش عمومي رياست په همکارۍ د هېواد له مرکز او ولايتونو څخه د ۲۳ روزنکو په گډون په فوټبال فدراسيون کې پيل شوی و، روزنکو ته د آسيا دويمه درجه فوټسال اسنادو په ورکړې سره پای ته ورسېد.
په ياد کورس کې روزونکو ته د سياليو تحلیل، پرمختللي تکتيکونه، ټیمي استراتیژي او پر پرمختللو موضوعاتو او مفهومونو باندې د ایران هېواد د نړيوالو مدرسينو" حسين شمس او رضا کوردي له لوري تدريس شول.
د دغه کورس د پای په مراسمو کې د المپيک، بدني روزنې او ورزش عمومي رياست فني او مسلکي مرستیال حافظ احمد جان ځدراڼ، د فوټبال فدراسيون رييس محمد يوسف کارگر، د فوټسال کمېټې مسؤل حاجي فريد يوسفزي، نړيوالو مدرسينو او روزنکو گډون کړی وو.
په دغو مراسمو کې د المپيک، بدني روزنې او ورزش عمومي رياست او د فوټبال فدراسيون فني او مسلکي مرستیال حافظ احمد جان ځدراڼ ټولو روزنکو ته د آسيا دويمه درجه فوټسال اسنادو د اخيستلو په پار مبارکي وويله او د ايران هېواد د نړيوالو مدرسينو له لوري افغان روزونکو ته د پرمختللو مفهومونو د ورکړې هر کلی یې وکړ او له هغوی څخه يې مننه وکړه، چې افغان روزنکو ته يې په ښه ډول تدريس وکړ.
همدارنگه په یادو مراسمو کې د فوټبال فدراسيون رييس محمد يوسف کارگر له نړيوالو مدرسينو څخه مننه وکړه، چې نهه ورځې يې افغان روزنکو ته د آسيا دويمه درجه فوټسال روزنيز کورس په ښه ډول پای ته ورسو، نوموړي همداراز افغان روزونکو ته وويل چې له دې وروسته د فوټسال ورزش او ورزشکارانو د ودې لپاره خپلې هڅې کړندۍ کړي.
