کابل؛ د مرحوم مير عبدالرشيد بېغم په نوم د بوکسنګ لومړى پړاو سيالۍ پاى ته ورسېدې
په پلازمېنه کابل کې د بدني روزنې او ورزش عمومي ریاست د سوکوهنې ملي فدراسیون په تمريناتي ځاى کې په افغانستان کې د بوکسنګ بنسټ اېښودونکي مرحوم مير عبدالرشيد بېغم په نوم د بوکسنګ لومړى پړاو سيالۍ پاى ته ورسېدې.
د دغو سياليو پر مهال د المپيک ملي کمېټې اجرائیه رئیس داد محمد پاينده اختري د بدني روزنې او ورزش عمومي ریاست د رهبري غړو، د بوکسنګ فدراسیون مسوولينو او ورزشکارانو شتون درلود.
د يادو سياليو پر مهال د المپيک ملي کمېټې اجرائیه رئیس داد محمد پاينده اختري د ورزش له نړيوالو بنسټونو وغوښتل چي ورزش دې نه سياسي کوي او پر افغانانو دې پابندي نه لګوي.
ښاغلي اختري زياته کړه؛ د ورزش نړيوال بنسټونه دې ورزش له سياست څخه جلا کړي او اجازه دې ورکړي چې د افغانستان ورزش هم پرمختګ او وده وکړي.
د بوکسنګ په دغو سياليو د شپږ ننګرهار، لغمان، پکتیا، غزني، پروان او کابل ولايتونو ٤٠ ورزشکارانو ګډون درلود.
دغو سياليو چې دوه ورځې يې دوام وکړ موخه يې په افغانستان کې د بوکسنګ لومړني بنسټه ايښودونکي مرحوم استاد مير عبدالرشيد بېغم يادول دي.
په پاى کې غوره ورزشکار ته کپ، مډال او ستاينليکونه هم ورکړل شول.
