کابل؛ د افغانستان ورزش ادارې مسوولینو د هېواد د والیبال ملي لوبډلې د استعداد موندنې او تمریني کمپ څخه لیدنه وکړه
د المپیک، بدني روزنې او ورزش عمومي ریاست اړوند د والیبال ملي فدارسیون له لوري د یاد ریاست په ۲۵۰۰ کسیز جمنازیوم کې د هېواد د والیبال ملي لوبډلې د استعداد موندنې او تمریني کمپ، چې ۲۵ ورځې مخکې پيل شوی د افغانستان ورزش ادارې مسوولینو له لوري یې لیدنه وشوه.
دغه تمریني کمپ د افغانستان والیبال ملي لوبډلې روزنکي او د حمید موحیدي نړۍوال روزونکي تر څارنې لاندې ترسره کېږي، چې تمه ده د تمریني کمپ له پای ته رسېدو وروسته ورزشکاران د اسیا کلبونو کپ سیالیو لپاره ، چې د ایران هېواد په کوربتوب ترسره کېږي ایران ته لاړ شي.
په دغه لیدنه کې د هېواد ورزش ادارې مسلکي او فني مرستیال حافظ احمدجان ځدراڼ، یاد ریاست ورزشي مشاور قاري حیات الله رحماني، د ورزش ادارې د دعوت او ارشاد ریاست رییس مولوي داد محمد بریال عطایي، یاد ریاست امرینو، والیبال ملي فدراسیون مسوولینو او د تمریني کمپ ورزشکارانو ګډون کړی وو.
د ورزش ادارې د دعوت او ارشاد ریاست رییس مولوي داد محمد بریال عطایي د والیبال ملي لوبډلې روزونکي حمید موحیدي ته له ایران څخه د راتلو ښه راغلاست ووایه او د ورزشکارانو د ظرفیت لوړونې په موخه د یاد تمریناتي کمپ په جوړېدو خوښي څرګنده کړه همدارنګه ورزشکارانو ته یې د تمریناتو او سیالیو په وخت کې د بدن پټولو او په خپل وخت د لمونځ کولو لازمه لارښوونه وکړه.
همدارنګه د هېواد ورزش ادارې مسلکي او فني مرستیال حافظ احمدجان ځدراڼ د ایران څخه راغلو روزونکو ته، چې د ورزش په بېلا بېلو برخو کې ورزشکارانو ته روزنه ورکوي مننه وکړه او د تمریناتي کمپ ورزشکارانو څخه د لا زیاتو بریاوو غوښتونکی و.
د یاد تمریناتي کمپ موخه د ورزشکارانو د ظرفیت لوړول دي، چې راتلونکي کې به دې ته ورته نور کمپونه هم ورزشکارانو ته برابر شي.
