پکتیکا؛ چهاربران ولسوالۍ کې د اتو لوبډلو ترمنځ د ټېپ بال کرېکټ سیالۍ پای ته ورسېدې
د پکتیکا ولایت د بدني روزنې او ورزش آمريت اړوند د ټېپ بال کرېکټ فدراسيون د استازولۍ له لوري د ياد ولايت په چهاربران ولسوالۍ کې د اتو لوبډلو ترمنځ د ټېپ بال کرېکټ سيالۍ، چې يوه ورځ مخکې پيل شوې وې د سپينه الف لوبډلې په اتلولۍ پای ته ورسېدې.
د دغو سياليو پايلوبه د سپينه الف او خېر مينځو ب لوبډلو ترمنځ ترسره شوه. د لوبې پچه سپينه الف لوبډلې وگټله او لومړی يې د توپ وهنې پرېکړه وکړه، چې په ټاکلو څلورو اورونو کې يې د درېيو لوبغاړو په سوځېدو سره خپلې سيالې لوبډلې ته د ۵۷ منډو هدف وټاکه، په مقابل کې خېر مينځو ب لوبډلې د ټولو اورونو په لوبولو سره ۴۲ منډې وکړې او لوبه يې د ۱۵ منډو په توپير وبايلله.
د يادو سياليو موخه په ليرې پرتو سيمو کې ورزش ته وده ورکول او د ځوانانو ترمنځ يووالی رامنځته کول وو.
