پکتیکا؛ په سروضه ولسوالۍ کې د فوټبال سیالۍ د علي محمد لوبډلې په اتلولۍ پای ته ورسېدې
د پکتیکا ولایت د بدني روزنې او ورزش آمریت اړوند د فوټبال فدراسیون په استازولۍ او د سلطانو ځوانانو له لوري د ۸ لوبډلو ترمنځ د فوټبال سیالۍ، چې یوه اوونۍ مخکې پیل شوې وې، د علي محمد لوبډلې په اتلولۍ پای ته ورسېدې.
د یادو سیالیو پایلوبه د علي محمد او پاس کلا لوبډلو ترمنځ ترسره شوه، چې په پایله کې علي محمد لوبډلې وکولای شول خپلې سیالې لوبډلې ته د ۲/۰ ګولونو په توپیر ماتې ورکړي او اتلولي په خپل نوم کړي.
د دغو سیالیو د ترسره کېدو موخه په کليو کې د فوټبال ورزش ته وده ورکول و او د سیالۍ په پای کې غوره لوبغاړو ته جایزې هم ورکړل شوې.
