پکتیکا؛ مټاخان ولسوالۍ کې د والیبال سیالۍ پای ته ورسېدې
د پکتیکا د بدني روزنې او ورزش امریت اړوند د والیبال فدراسیون د سیدو کلا والیبال کمېټې په همغږۍ او د کابل پطرول پمپ په مالي ملاتړ د ۲۶ لوبډلو ترمنځ سیالۍ، چې له خوست، پکتیا، میدان وردګ ، غزني او پکتیکا یې ګډون کړی وو، د میدان وردګ ولایت په بري پای ته ورسېدې.
دا لوبې ۲۵ ورځې وړاندې پيل شوې وې، چې پایلوبه یې د میدان وردګ شاهد او خوستۍ مسوول خان لوبډلو ترمنځ ترسره شوه، چې په پایله کې یې میدان وردګ لوبډلې د ۱/۳ ډګرونو په توپیر سیاله لوبډله ماته کړه.
د دې سیالیو موخه د ځوانانو ترمنځ یووالی رامنځته کول وو، چې د سیالیو په پای کې ولایتي مسوولینو پر نورو جایزو سربېره لومړي مقام وړونکي لوبډلې ته شل زره افغانۍ او دویم مقام ګټونکي ته یې پنځه زره افغانۍ نغدې جایزې ورکړې.
