پکتیکا؛ ارګون ولسوالۍ کې د ٢٠ لوبډلو ترمنځ د والیبال سیالۍ پای ته ورسېدې
د پکتیکا ولایت د بدني روزنې او ورزش آمریت اړوند د والیبال فدراسیون د استازولي له لوري د ياد ولايت په ارګون ولسوالۍ کې د ٢٠ لوبډلو ترمنځ د والیبال سیالۍ د محمدخېلو لوبډلې په اتلولي پای ته ورسېدې.
د یادو سیالیو پایلوبه د محمدخېلو او شاهین علي خېلو لوبډلو ترمنځ ترسره شوه، چې په پايله کې یې محمدخېلو لوبډلې د ٢ پر صفر میدانونو په توپیر خپلې سیالې لوبډلې ته ماتې ورکړه او اتلولي یې په خپل نوم کړه.
دا سیالۍ ورزش ته د ځوانانو د هڅولو په موخه ترسره شوه، چې ١٢ ورځې یې دوام وکړ او په پای کې اتلې لوبډلې او غوره لوبغاړو ته چمتو شوې ډالۍ ورکړل شوې.
