په نیمروز ولایت کې د موی تای ملي لوبډلې ټاکنیزې سیالۍ پیل شوې
نیمروز ولایت کې د موتای ملي لوبډلې ټاکنیزي سیالۍ د یو لړ ځانګړو مراسمو په ترڅ کې پیل شوې.
دغو سیالیو کې د نیمروز په ګډون د ۲۰ ولایتونو ۱۵۰ ورزشکاران ګډون درلود، خو د ۸ ولایتونو ورزشکارانو چې ۳۳ تنه کیږي د یو لړ ستونزو له امله دې سیالیو کې ګډون ونکړ، او د ۱۲ نورو ولایتونو ۱۱۷ لوبغاړي به په درې " کمکیو ځوانانو، ځوانانو او لویانو"ډلبندیو او یولسو بېلابيلو وزنونو کې یو د بل پر وړاندي سیالۍ وکړي.
دا سیالۍ چې د زرنج په کوربتوب د اتلانو په نوري ورزشي لوبغالي کې د پنځه ورځو لپاره ترسره کیږي له کابل، هرات، غزني، لوگر، بلخ، کندهار، پکتیکا، بادغیس، بامیان، لغمان ،جوزجان، او میدان وردګو ولایتونو د موی تای ورزشکارانو پکې برخه اخیستې ده.
دغه سیالۍ د موی تای ملي فدراسیون او نیمروز ولایت د بدني روزنې او ورزش امریت په همکارۍ پیل شوې.
په دې سیالیو کې د پلازمېنې کابل څخه راغلي پلاوي هر یو محمدفهیم خیري، محمد اکرم نادري، سید فضل الله فضلي، د موی تای ملي فدراسیو سرپرست مطیع الله نوري، د نیمروز د بدني روزنې او ورزش امر عبدالشکور نوابي، د اطلاعاتو او کلتور رییس حبیب الله الهام، ګڼو نورو حکومتي او ورزشي چارواکو، مخورو، ځوانانو ، ورزشکارانو او ګڼ شمېر مینوالو ګډون کړی وو.
دا سیالۍ د کابل او نیمروز ورزشکارانو په لوبې پیل شوې چې لومړۍ لوبه د کابل په ګټه پای ته ورسېده.
دغه سیالۍ چې د موی تای ملي فدراسیون د ۱۴ باتجربه او ځوانو لوبڅارانو له لوري څارل کېږي په پای کې به له یادو شاوخوا ۱۲۰ ورزشکارانو څخه په هر وزن کې درې تنه او ټولټال به ۳۳ تنه د هیواد ملي لوبډلې ته غوره شي.
د یادونې وړ ده چې له سیالیو وړاندې لوبڅارانو، روزونکو او ورزشکارانو ته د لا ښه پوهاوي په پار ښوونیز سمینار هم په پام کې نیول شوی و.
