په بلخ کې د فولرزم، پروفیشنل کیک بوکسنګ او موی تای سیالۍ وشوې
په بلخ ولایت کې د فول رزم ملي فدراسیون له لوري د بلخ ولایت د ۲۲ ورزشکارانو ترمنځ د ګڼ شمېر مینوالو په منځ کې د فولرزم، پروفیشنل کیک بوکسنګ او موی تای سیالۍ وشوې.
د بلخ ولایت د فول رزم فدراسیون د رئیس نثار احمد فیضي په خبره دغه سیالۍ د بلخ ولایت د ټولو رزمي رشتو ترمنځ وې، چې موخه یې د ځوانو استعدادونو د وړتیاوې لوړول او په سیالیو کې د غوره څېرو په ګوته کول وو.
د سیالیو پیاوړیو لوبغاړو ته یو-یو بایسکيل د ډالۍ په توګه ورکړل شو.
د سیالیو یو تن برخه وال ځوان ورزشکار مجیب الرحمن راسخ د ورته سیالیو له ترسره کېدو څخه خوښي وښوده او په خبره یې، چې موږ د خپلو ورزشي مهارتونو د لوړولو او روغتیا په موخه برخه پکې اخیسې. نوموړي همدارنګه د ځوانانو د هڅونې او ملاتړ په برخه کې د بدني روزنې او سپورت ریاست هڅې د قدر وړ وبللې.
