هلمند کې د نهو ولايتونو ترمنځ د بست په نوم د غېږنیونې ټاکنيزې سيالۍ پای ته ورسېدې
د المپيک، بدني روزنې او ورزش عمومي ریاست اړوند د پهلواني ملي فدراسيون په همکارۍ او د The Liaison office موسیسې په مالي ملاتړ د ياد ولايت په مرکز لښکر گاه ښار کې د نهو ولايتونو د لسو لوبډلو ترمنځ د سويل لوېديځ زون لوبډلې ته د غوره غېږنیونکو ټاکلو په موخه د بست په نوم د غېږنیونې سيالۍ پای ته ورسېدې.
د دغو سياليو د پای په مراسمو کې د المپيک، بدني روزنې او ورزش عمومي رييس مولوي احمدالله وثيق، د ياد رياست ورزشي مشاور قاري حيات الله رحماني، د کابل بدني روزنې او ورزش رييس مولوي عتیق الله خالد، د ولایتونو د ورزش مسؤلینو، سوداګرو، مخورو، غېږ نيونکو او زر گوونو ننداره چيانو گډون کړی و.
په يادو سياليو کې له کندهار، زابل، هرات، بادغيس، ارزگان، فراه، نيمروز، غور او هلمند الف او ب لوبډلو څخه ۱۰۰ تنو غېږنیونکو په " ۶۰، ۶۵، ۷۰، ۷۴، ۸۰، ۸۵، ۹۰، ۹۵، ۱۰۰، او ۱۰۰ + " وزني کټگوريو کې گډون کړی، چې په پايله کې يې ۴۰ تنه غېږ نيونکي د سويل لويديځ زون لوبډلې ته وټاکل شول او همدارنگه د ولایتونو په کچه هرات ۵ د سرو زرو، ۱ سپينو زرو، ۱ برنزو مډالونو او ۶۴ امتيازونو په تر لاسه کولو لومړی، بادغيس ۲ د سرو زرو، ۲ سپینو زرو، ۴ برنزو مډالونو او ۵۰ امتيازونو په ترلاسه کولو دويم او غور ۱ د سرو زور، ۲ سپينو زرو، ۴ برنزو مډالونو او ۳۲ امتيازونو په ترلاسه کولو سره بيا درېيم مقام ترلاسه کړ.
د يادولو وړ ده، چې دغه سيالۍ په کمربندي سبک کې ترسره شوې او دوې ورځې يې دوام وکړ.
