هلمند؛ ګرمسېر ولسوالۍ کې د ۱۶ لوبډلو ترمنځ د فوټبال سیالۍ پیل شوې
د هلمند ولایت د بدني روزنې او ورزش امریت اړوند د فوټبال فدراسیون د استازولۍ له لوري د یاد ولایت په ګرمسېر ولسوالۍ کې د ۱۶ لوبډلو ترمنځ د فوټبال سیالۍ پیل شوې.
د دغو سیاليو لومړۍ لوبه د رضوان او لغمان شاهي لوبډلو ترمنځ ترسره شوه، چې په پایله کې یې لغمان شاهي لوبډلې د یو پر صفر ګول په توپیر خپلې سیالې لوبډلې ته ماتې ورکړه او د سیالیو لومړۍ بریا یې خپله کړه.
دا سیالۍ فوټبال غوره لیګ سیالیو ته د چمتو والي په موخه پیل شوې دي، چې دوې اوونۍ به دوام وکړي.
