هلمند؛ په ګرشک ولسوالۍ کې د ۱۲ لوبډلو ترمنځ د ټېپ بال کرېکټ سيالۍ پيل شوې
د هلمند ولایت د بدني روزنې او ورزش امريت اړوند د ټېپ بال کرېکټ فدراسيون د استازولۍ له لوري د ياد ولايت ګرشک ولسوالۍ په مرکزي لوبغالي کې د ۱۲ لوبډلو ترمنځ د ټېپ بال کرېکټ سيالۍ پيل شوې.
د دغو سياليو لومړۍ لوبه د ميوند او ګرشک زلميانو لوبډلو ترمنځ ترسره شوه، ګرشک زلميانو لوبډلې د پچې په ګټلو سره د توپ وهنې پرېکړه وکړه، چې په ټاکلو ۱۵ اورونو کې مقابلې لوبډلې ته د ۱۱۴ منډو هدف وټاکه. په ځواب کې د ميوند لوبډلې ټاکل شوې هدف د لوبې په لسم اور کې د شپږو لوبغاړو په سوځېدو سره پوره کړ او لوبه يې د څلورو ويکټو په توپير سره وګټله.
د يادو سياليو موخه ورزش ته د ځوانانو هڅول او يووالی دي، چې يوه مياشت به دوام وکړي.
