هلمند؛ ناوې ولسوالۍ د ۱۰ لوبډلو ترمنځ د ټېپ بال کرېکټ سيالۍ پای ته ورسېدې
د هلمند ولايت د بدني روزنې او ورزش آمريت په همغږۍ، د ټېپ بال کرېکټ فدراسیون د استازولۍ له لوري د ناوې ولسوالۍ په خلچ سیمه کې د ۱۰ لوبډلو ترمنځ د ټېپ بال کرېکټ گروپي سيالۍ د عزيزي اتحاد لوبډلې په اتلولۍ پای ته ورسېدې.
د يادو سياليو پايلوبه د عزيزي اتحاد او ناصرانو لوبډلو ترمنځ وشوه، د لوبې پچه ناصرانو لوبډلې وگټله او لومړی يې د توپ وهنې پرېکړه وکړه، چې په ټاکلو ۱۲ اورونو کې يې خپلې سيالې لوبډلې ته د ۱۴۳ منډو هدف کېښود، په ځواب کې عزيزي اتحاد لوبډلې ياد هدف په ۷م اور کې ترلاسه کړ او لوبه يې د ۵ ویکټو په توپیر وگټله.
دا سيالۍ د ځوانانو د سالمې بوختيا او هڅونې په موخه وشوې، چې شاوخوا ۱۵ ورځې يې دوام وکړ.
