هلمند؛ نادعلي ولسوالۍ کې د ۲۱ لوبډلو ترمنځ د ټېپ بال کرېکټ سیالۍ پای ته ورسېدې
د هلمند ولایت د بدني روزنې او ورزش آمریت اړوند د ټېپ بال کرېکټ فدراسیون د استازولۍ له لوري د ياد ولايت په نادعلي ولسوالۍ کې د ۲۱ لوبډلو ترمنځ د ټېپ بال کرېکټ سیالۍ د حیات ارمان لوبډلې په اتلولي پای ته ورسېدې.
د یادو سیالیو پایلوبه د محمدي او حیات ارمان لوبډلو ترمنځ ترسره شوه. د لوبې پچه محمدي لوبډلې وګټله او لومړی یې توپ وهنه وکړه، چې په ټاکلو لسو اورونو کې یې خپلې سیالې لوبډلې ته د ١۴۱ منډو هدف وټاکه. حیات ارمان لوبډلې ټاکلی هدف د پنځو ویکټو په زیان د لوبې په اتم اور کې ترلاسه کړ او د پنځو ویکټو په توپیر یې د دغو سیالیو اتلولي وګټله.
دا سیالۍ د ځوانانو ترمنځ د یووالي په موخه ترسره شوې، چې شل ورځې یې دوام وکړ او په پای کې اتلې لوبډلې ته یو عراده بایسکل د ډالۍ په توګه ورکړل شو.
