هلمند؛ نادعلي ولسوالۍ کې د ټېپ بال کرېکټ سيالۍ پای ته ورسېدې
د هلمند ولايت د بدني روزنې او ورزش آمريت په همکارۍ، د ټېپ بال کرېکټ فدراسيون د استازولۍ له لوري د نادعلي ولسوالۍ په مرکزي لوبغالي کې د ۱۲ لوبډلو ترمنځ د ټېپ بال کرېکټ سيالۍ د حاجي سلطان لوبډلې په اتلولۍ پای ته ورسېدې.
د يادو سياليو پايلوبه د حاجي سلطان او خادم اتلانو لوبډلو ترمنځ وشوه، د لوبې پچه خادم اتلانو لوبډلې وگټله او لومړی يې د توپ وهنې پرېکړه وکړه، چې په ټاکلو لسو اورونو کې يې خپلې سيالې لوبډلې ته د ۱۰۳ منډو هدف کېښود، په ځواب کې حاجي سلطان لوبډلې ياد هدف په ۸م اور کې ترلاسه کړ او لوبه يې د ۸ ویکټو په توپير وگټله.
دا سيالۍ د ځوانانو د سالم مصروفیت په موخه وشوې او ۲۰ ورځې يې دوام وکړ.
