هلمند؛ سنگين ولسوالۍ کې د ټېپ بال کرېکټ اختريزې سيالۍ پيل شوې
د هلمند ولايت د بدني روزنې او ورزش آمريت په همغږۍ، د ټېپ بال کرېکټ فدراسیون د استازولۍ له لوري د ياد ولايت په سنگين ولسوالۍ کې د ۲۲ لوبډلو ترمنځ د ټېپ بال کرېکټ ۱۴م پړاو اختريزې سيالۍ پيل شوې.
د يادو سياليو پيليزه لوبه د سنگين اتلانو او زمين داور اتلانو لوبډلو ترمنځ وشوه، د لوبې پچه زمين داور اتلانو لوبډلې وگټله او لومړی يې د توپ وهنې پرېکړه وکړه، چې په ټاکلو لسو اورونو کې يې د نهو لوبغاړو په سوځېدو سره خپلې سيالې لوبډلې ته د ۱۴۲ منډو هدف کېښود، په ځواب کې سنگين اتلانو لوبډلې ياد هدف په اتم اور کې ترلاسه کړ او لوبه يې د اتو ویکټو په توپیر وگټله.
د ويلو وړ ده، چې دغه سيالۍ به شاوخوا دوې اوونۍ دوام وکړي.
