هلمند؛ د ټېپ بال کرکټ د رمضان جام سیالیو په دوام دوه لوبې ترسره شوې
د هلمند ولایت د بدني روزنې او ورزش امریت له لوري په غازي محمد ایوب خان ورزشي لوبغالي کې د ټېپ بال کرکټ د رمضان جام سیالیو په دوام، نن شپه دوې سیالۍ ترسره شوې.
په لومړۍ سیالۍ کې د آزاد کرکټ او یاران لوبډلې د سیالۍ لپاره میدان ته ښکته شوې، په پیل کې د آزاد کرکټ لوبډلې د توپ وهنې پرېکړه وکړه او په ټاکلو لسو اورونو کې یې د ۶ لوبغاړو په سوځېدو سره خپلې سیالې لوبډلې ته ۱۲۳ منډې هدف کېښود، بل پلو د یادې سیالۍ په دویمه نیمایي کې یاران لوبډلې یاد هدف ته په نهم اور کې ځان ورساوه او سیالې لوبډلې ته یې په پنځو ویکټو ماتې ورکړه.
د دغې سیالي غوره لوبغاړی احسان الله محسن و، چې په ۱۵ بالونو سره یې نیمه سلیزه جوړه کړه.
همداراز دویمه لوبه د پارکر او کلیوال زلمي لوبډلو ترمنځ ترسره شوه، لومړی توپوهنه پارکر لوبډلې پیل کړه او په ټاکلو ۱۰ اورونو کې یې د ۸ لوبغاړو په سوځېدو سره ۹۹ منډې جوړې کړې، بل پلو کلیوال زلمي لوبډلې دغه هدف ته د پنځم اور په درېیم بال ځان ورساوه او سیالې لوبډلې ته یې په ۹ ویکټو ستره ماتې ورکړه.
د دغې سیالۍ غوره لوبغاړی شاه محمد و چې په ۲۳ توپونو باندې یې ۹۶ ناسوځېدلې منډې جوړې کړې.
باید یادونه وشي، چې دغه سیالۍ د هلمند ولایت په غازي محمد ایوب خان ورزشي لوبغالي کې د روژې میاشتې په مناسب پیل شوي او تر راتلونکي کوچني اختر پورې به دوام وکړي.
