ننگرهار کې د ۲۲ لوبډلو ترمنځ د ټېپ بال کرکټ سيالۍ پيل شوې
د ننگرهار ولايت د بدني روزنې او ورزش رياست په همکارۍ د ياد ولايت په مومندرې ولسوالۍ کې د ۲۲ لوبډلو ترمنځ د فکري رغوونې او سالمې تفريح برابرولو په موخه د ټېپ بال کرکټ سيالۍ، چې شاوخوا يوه نيمه مياشت به دوام وکړي، د کېنگ سټار لوبډلې په بريا پيل شوې.
د يادو سياليو لومړنۍ لوبه د کېنگ سټار او هزارناو سوپر سټار لوبډلو ترمنځ ترسره شوه، چې هزارناو سوپر سټار لوبډلې د لوبې پچې په گټلو سره په ټاکلو اتو اورونو کې د څلورو لوبغاړو په سوځېدو سره سیالې لوبډلې ته د ۹۰ منډو هدف وټاکه، په مقابل کې کېنگ سټار لوبډلې ياد هدف د لوبې په اووم اور کې ترلاسه کړ او د څلورو ویکټو په توپير يې بريا خپله کړه.
