ننگرهار؛ پېښې خوړ اتلانو لوبډلې د سپين غر ولسوالۍ د ټېب بال کرکټ سياليو اتلولي وگټله
د ننگرهار ولايت د بدني روزنې او سپورټ رياست اړوند د ټېب بال فدراسيون د استازولۍ او د شينوارو شپږگونو ولسواليو ورزشي مديريت له لوري دې ولايت په سپين غر ولسوالۍ کې د ۳۸ لوبډلو ترمنځ د ځوانانو اتفاق په نوم د ټېب بال کرکټ سيالۍ د پېښې خوړ اتلانو لوبډلې په اتلولۍ پای ته ورسېدې.
د يادو سياليو پايلوبه د مارکو کېنگ او پېښې خوړ اتلانو لوبډلو تر منځ ترسره شوه، چې په پايله کې مارکو کېنگ لوبډلې په ټاکلو لسو اورونو کې خپلې سيالې لوبډلې ته د ۱۰۸ منډو هدف کېښود، پېښې خوړ اتلانو لوبډلې ياد هدف تر لاسه کړ او د درېيو ویکټو په توپیر يې بريا خپله کړه.
د يادونې وړ ده، چې د دغو سياليو د ترسراوي موخه د ځوانانو تر منځ يووالی و، چې شاوخوا ۷۱ ورځې يې دوام وکړ.
په پای کې گټونکې لوبډلې ته د اتلولۍ جام ورکړل شو.
