ننگرهار؛ روداتو ولسوالۍ کې د اتلولۍ جام په نوم د ټېپ بال کرېکټ سيالۍ پيل شوې
د ننگرهار ولايت د بدني روزنې او د ورزش رياست په همغږۍ، د ټېپ بال کرېکټ فدراسيون د استازولۍ له لوري د روداتو ولسوالۍ اړوند بانډې جلگه سیمه کې د ۲۴ لوبډلو ترمنځ د "اتلولۍ جام" په نوم د ټېپ بال کرېکټ ۶م پړاو سيالۍ پيل شوې.
د يادو سياليو پيليزه لوبه د سلام او وحدت لوبډلو ترمنځ وشوه، سلام لوبډلې د لوبې پچه وگټله او لومړی يې د توپ وهنې پرېکړه وکړه، چې په ټاکلو ۱۰ اورونو کې يې د ۶ لوبغاړو په سوځېدو سره خپلې سيالې لوبډلې ته د ۱۱۴ منډو هدف کېښود، وحدت لوبډلې په ځواب کې د ټولو اورونو په لوبولو سره ۱۰۲ منډې وکړې او لوبه يې د ۱۲ منډو په توپير وبايلله.
د ويلو وړ ده، چې دغه سيالۍ به شاوخوا يوه مياشت دوام وکړي.
