ننګرهار کې د اوو ولایتونو ترمنځ د بایسکل ځغلونې سیالۍ ترسره شوې
د ننګرهار ولایت د بدني روزنې او ورزش ریاست اړوند د بایسکل ځغلونې فدراسیون د استازولۍ له لوري د یاد ولایت مرکز جلال اباد ښار کې د اوو ولایتونو ترمنځ د بایسکل ځغلونې سیالۍ ترسره شوې.
دغه سیالۍ له کابل، ننګرهار، لغمان، پنجشېر، پکتیا، میدان وردګ او پروان ولایتونو د ۳۲ ورزشکارانو ترمنځ د جلال اباد ښار له لومړۍ ناحیې تر امان الله خان ښار ګوټي پورې ترسره شوې، چې په پایله کې یې سیدالله سادات لومړی، نقیب الله دویم او شریف الله درېیم مقام ترلاسه کړ.
دا سیالۍ په ننګرهار کې د بایسکل ځغلونې ورزش ته د ودې ورکولو او دغې رشتې ته د ځوانانو د هڅولو په موخه ترسره شوې، چې یوه ورځ یې دوام وکړ.
