ننګرهار؛ ګوشتې ولسوالۍ کې د ۴۴ لوبډلو ترمنځ د ټېپ بال کرېکټ سیالۍ پای ته ورسېدې
د ننګرهار ولایت د بدني روزنې او ورزش ریاست اړوند د ټېپ بال کرېکټ فدراسیون د استازولي له لوري د یاد ولایت په ګوشتې ولسوالۍ کې د ۴۴ لوبډلو ترمنځ د ټېپ بال کرېکټ سیالۍ د کامې ځوانانو په اتلولي پای ته ورسېدې.
د یادو سیالیو پایلوبه د ګوشتې شاهانو او کامې ځوانانو لوبډلو ترمنځ ترسره شوه. د لوبې پچه د ګوشتې شاهانو لوبډلې وګټله او لومړی یې د توپ وهنې پرېکړه وکړه، چې په ټاکلو لسو اورونو کې یې د خپلو ټولو لوبغاړو په له لاسه وروکولو سره خپلې سیالې لوبډلې ته د ۶۲ منډو هدف وټاکه. کامې ځوانانو لوبډلې د لوبې په شپږم اور کې د خپل یو لوبغاړي پّ له لاسه ورکولو سره ترلاسه کړ او د نهو ویکټو په توپیر یې د دغو سیالیو اتلولي وګټله.
دا سیالۍ ورزش ته د ودې ورکولو په موخه ترسره شوې، چې یوه نیمه میاشت یې دوام وکړ او په پای کې اتلې لوبډلې ته یو عراده بایسکل ورکړل شو.
