ننګرهار؛ په کوټ ولسوالۍ کې د ۱۶ لوبډلو ترمنځ د والیبال سیالۍ پیل شوې
د ننګرهار ولایت د بدني روزنې او ورزش ریاست له لوري د دې ولایت د کوټ ولسوالۍ په هندرانو مرکزي میدان کې د ۱۶ لوبډلو ترمنځ د والیبال سیالۍ پیل شوې.
دغه سیالۍ چې موخه یې د ځوانانو ترمنځ یووالی یاد شوی، لومړۍ لوبه یې د تاج ملوک او معلم اسرار لوبډلو ترمنځ ترسره شوه، چې په پایله کې تاج ملوک لوبډلې خپلې سیالې لوبډلې ته د ۲-۱ میدانونو په توپیر ماتې ورکړه او بریا یې خپله کړه.
یادې سیالۍ چې اته ورځې په دوام وکړي، د پیل په مراسمو کې يې د ورزش ګڼو مینوالو ګډون کړی و.
