ننګرهار؛ د کال غوره لوبډلې د غوراوي په موخه د شپږو ولسوالیو ترمنځ د فوټبال سیالۍ پیل شوې
د ننګرهار ولایت د بدني روزنې او سپورت ریاست او د فوټبال فدراسیون په همغږۍ د کال غوره فوټبال لوبډلې د ټاکلو په موخه د شپږو ولسوالیو د لوبډلو ترمنځ د فوټبال سیالۍ پیل شوې.
د سیالیو د پیل په مراسمو کې د ننګرهار ولایت د بدني روزنې او ورزش رییس عبدالسلام "وزیروال"، د فو ټبال فدراسیون مسؤلینو، ورزشکارانو، امنیتې مسؤلینو او د فوټپال ګڼ شمېر مینوالو برخه اخیستې وه.
په دې سیالیو کې له سره رود، بهسود، رودات، چپرهار، ښيوې او بړو څخه یوې یوې فوټبال لوبډلې برخه اخیستې ده، چې لومړۍ لوبه یې د سره رود او بهسودو ولسوالیو د لوبډلو ترمنځ تر سره شوه، په پایله کې د یو، یو ګول په وهلو سره مساوي پای ته ورسیده.
دغه سیالۍ چې د لومړي ځل لپاره د ولسوالیو په کچه ترسره کیږي، لس ورځې به دوام ولري او راتلونکې لوبه به یې د چپرهار او ښېوې ولسوالیو د لوبډلو ترمنځ تر سره شي.
