ننګرهار؛ دور بابا ولسوالۍ کې د ٢۵ لوبډلو ترمنځ د ټېپ بال کرېکټ سیالۍ پای ته ورسېدې
د ننګرهار ولایت د بدني روزنې او ورزش ریاست اړوند د ټېپ بال کرېکټ فدراسیون د استازولۍ له لوري د ياد ولايت په دور بابا ولسوالۍ کې د ۲۵ لوبډلو ترمنځ د ټېپ بال کرېکټ سیالۍ د سوپر سټار لوبډلې په اتلولي پای ته ورسېدې.
د یادو سیالیو پایلوبه د سوپر سټار او ینګ ګړوکو لوبډلو ترمنځ ترسره شوه. د لوبې پچه ینګ ګړوکو لوبډلې وګټله او لومړی یې توپوهنه وکړه، چې په ټاکلو اتو اورونو کې یې د شپږو ویکټو په زیان سره خپلې سیالې لوبډلې ته د ٩٩ منډو هدف وټاکه. سوپر سټار لوبډلې ټاکلی هدف د دوو ویکټو په زيان د لوبې په شپږم اور کې ترلاسه کړ او د اتو ویکټو په توپیر یې د سیالیو اتلولي یې وګټله.
دا سیالۍ ځوانانو ته د سالمې تفرېح برابرولو په موخه ترسره شوې، چې یوه میاشت یې دوام وکړ.
