ميدان وردگ کې د ۶۰ لوبډلو ترمنځ د اختریز جام په نوم د واليبال سيالۍ پای ته ورسېدې
د ميدان وردگ ولايت د بدني روزنې او ورزش آمريت اړوند د واليبال فدراسيون د استازولۍ له لوري د ياد ولايت په سیدآباد ولسوالۍ کې د ۶۰ لوبډلو ترمنځ د اختریز جام په نوم د واليبال سيالۍ، چې درې اوونۍ مخکې پيل شوې وې د استاد حميدالله لوبډلې په اتلولۍ پای ته ورسېدې.
په يادو سياليو کې له کابل، لوگر، غزني او ميدان وردگ ولايتونو څخه لوبډلو گډون کړی وو، چې پايلوبې ته يې د استاد حميدالله او م.ج.ا.ه.د لوبډلو لار پېدا کړه، چې په پايله کې استاد حميدالله لوبډلې خپلې سيالې لوبډلې ته د ۲ پر ۱ ميدانونو په توپير ماتې ورکړه او اتلولي يې په خپل نوم کړه.
د ويلو وړ ده، چې د دغو سیالیو موخه د قومونو او ځوانانو ترمنځ يووالی وو.
