ميدان وردګ؛ د ۲۰ لوبډلو ترمنځ د واليبال سياليو اتلولي شهباز خان لوبډلې خپله کړه
د ميدان وردګو ولايت د بدني روزنې او ورزش امريت او چک ولسوالۍ د سپورټي کمېټې په همغږۍ د يادې ولسوالۍ عربانو درې په سنګين کلي کې د ۲۰ لوبډلو ترمنځ د واليبال سياليو اتلولي شهباز خان لوبډلې خپله کړه.
دغو سياليو چې څلور ورځې يې دوام وکړ، په پايلوبه کې شهباز خان لوبډلې خپلې سيالې حيدر لوبډلې ته د ۳_۱ ميدانونو په توپير ماتې ورکړه او اتلولي يې خپله کړه.
هېره دې نه وي چې د دغو سياليو موخه ورزش ته وده ورکول او د ځوانانو ترمنځ يووالی و.
د يادونې وړ ده چې په پای کې غوره لوبډلو او لوبغاړو ته کپونه او ستاينليکونه ورکړل شول.
