محمداعظم کوهي د وزن پورته کولو سیالیو د لوبڅاري لپاره چین ته روان شو
د بدني روزنې او ورزش عمومي ریاست د فدراسیونونو امر او د وزن پورته کولو فدراسیون رئيس محمداعظم کوهي د المپیک ملي کمېتې او سپورټ عمومي رئیس مولوي احمدالله وثیق او فني او مسلکي مرستیال حافظ احمدجان ځدراڼ سره تر لېدنې او مخې ښې وروسته، د چین هېواد هانګژو ښار په کوربتوب ۱۹ پړاو اسیایي سیالیو کې د وزن پورته کولو سیالیو د لوبڅاري لپاره چین ته روان شو.
ښاغلی کوهي د وزن پورته کولو بین المللي فدراسیون له لوري د وزن پورته کولو اسیایي سیالیو کې د لوبڅار په توګه ټاکل شوی او هلته به د افغانستان په استازیتوب د لوبڅاري چاري پرمخ بیایي.
محمداعظم کوهي په ۲۰۰۰ کال کې د وزن پورته کولو په برخه کې تر عملي او نظري ازموینې وروسته د وزن پورته کولو بین الملي فدراسیون له لوري د لومړۍ درجې لوبڅار په توګه وټاکل شو.
نوموړي له هغه را وروسته د وزن پورته کولو په ګڼ شمېر بین المللي سیالیو کې د لوبڅار په توګه دنده ترسره کړې.
د چین هېواد د هانګژو ښار په کوربتوب اسیایي سیالۍ د ۴۵هېوادونو د ۱۲زرو او ۵۰۰ وزرشکارانو په ګډون د سپټمبر په ۲۳نېټه پیل شوې چې د افغانستان د وزن پورته کولو ورزشکارانو په ګډون د ۱۵ ورزشي رشتو تر ۸۰ زیات ورزشکاران هم پکي برخه لري، چې تر دې مهاله ښې لاسته راوړنې هم پکي لري.
د وزن پورته کولو فدراسیون د معلوماتو له مخې په دغو سیالیو کې د وزن پورته کولو سیالۍ به د سپټمبر په ۳۰ نېټه پیل شي چې شاوخوا اته ورځې به دوام وکړي.
