له اسيايي المپيک سياليو درې مډال ګټونکي لوبغاړي هېواد ته راستانه شول
د اسيايي المپيک په سياليو کې د ګډونکوونکي ورزشکاران له درې مډالونو سره نن سهار په پوره وياړ او ډک لاسونه هېواد ته راستانه شول او د سپورت عمومي رياست د مشرتابه، ورزشکارانو او د ورزش مينه والو له لوري يې تود هرکلى وشو.
په همدې مناسبت جوړ شويو مراسمو کې د بدني روزنې او سپورت عمومي ریاست فني او مسلکي مرستیال حافظ احمد جان ځدراڼ، د تکواندو، ووشو او جودو فدراسیون مسوولینو، ورزشکارانو او د دغو درېیو ورزشي رشتو سلګونو مینه والو برخه اخیستې وه او د ګولو د ګېډیو په ورکولو سره یې د راغلو لوبغاړو ستاینه وکړه.
وروسته د هېواد یاد مډال ګټونکي ورزشکاران د المپيک ملي کمېټې مرکزي دفتر ته ولاړل او د مينه والو او د ورزش رياست د مشرتابه له خوا يې تود هرکلى وشو..
دا پروګرام چې د چين په کوربه توب د اسيايي المپيک په سياليو کې د هېواد د مډال ګټونکو لوبغاړو د تشويق او ستاينې په موخه جوړه شوی و، د المپيک ملي کمېټې او سپورت عمومي رييس مولوي احمدالله وثيق، د دغه رياست فني او مسلکي مرستيال حافظ احمد جان ځدراڼ د رياست سلاکار حيات الله رحماني ، ګڼ شمېر ورزشکارانو او مينه والو هم ګډون کړی و.
په دغه تشويقي پروګرام کې د هېواد د المپيک ملي کمېټې او سپورت عمومي رئیس مولوي احمدالله وثيق وينا وکړه او ويې ويل: تاسو، ستاسو قدرمنو کورنيو، اړونده فدراسيون او ټول ملت ته د دغې لاسته راوړنې او مډال مبارکي وړاندې کوم. هغه دا د سپورت په برخه کې یوه لویه لاسته راوړنه وبلله.
ښاغلي وثیق د خپلو خبرو په ترڅ کې وویل: موږ د ډېرو مډال ګټونکو لوبغاړو د ستاینې شاهدان یو چې هېواد ته یې ستر ویاړونه راوړي دي، نوموړي وويل، چې د ورزش رياست به له ورزشکارانو څخه په هره برخه کې هېڅ راز ملاتړ او مرسته درېغ نکړي. نوموړی د ا.ا له مشرانو سره د ورزشکارانو د ملاقات او د هغوی د مالي او مالي مرستو غوښتونکی شو.
نوموړي زیاته کړه: دا د خوښۍ خبره ده چې د سپورت په تاريخ کې د لومړي ځل لپاره په دې سياليو کې ګڼ شمېر افغان ورزشکارانو ګډون کړی او هېواد ته یې ویاړ وروباښه، په داسې سترو ورزشي سياليو کې ګډون کول اسانه کار نه دی، د افغانستان د ورزش په تاريخ کې زموږ ورزشکارانو په خپل هوډ او قوي ارادې سره په دې سياليو کې برخه اخیستې او خپل ګران هېواد ته وياړونه راوړي، هغه زياته کړه، داسې هېوادونه شته چې زموږ په پرتله زياتې اسانتياوې او امکانات لري او ډېر لوبغاړي یې په ورته برنامو کې برخه اخلي، خو هېڅ مډال یې نه دی ګټلی، زموږ د هېواد ورزشکاران لږې اسانتیاوې او امکانات لري او ډک لاس هېواد ته راستنیږي، دا ډېر د ویاړ او خوښۍ ځای دی.
ښاغلي وثیق وویل، چې د ا.ا.ا له راتګ سره ورزشي ډګر د ودې او پرمختګ په حالت کې دی، سپورت نه یوازې په مرکز بلکې د هېواد په کلیو او لرې پرتو سیمو کې هم په عادي ډول روان دی.
په پای کې ښاغلي وثیق ژمنه وکړه چې د ټولو ورزشي ډګرونو ورزشکارانو ته به د امکان تر حده ښه ورزشي زمینه برابره کړي او هڅه کوي چې د دغو ورزشکارانو لپاره د معنوي ملاتړ ترڅنګ مالي ملاتړ هم پیدا کړي، تر څو ورزشکاران له کومې ستونزې پرته خپل ورزش او ژوند ته دوام ورکړي.
په غونډه کې د بدني روزنې او ورزش د عمومي رياست فني او مسلکي مرستيال حافظ احمد جان ځدراڼ هم وينا وکړه او ويې ويل: په دې مهمو او اساسي سياليو کې زموږ د ورزشکارانو په ګډون او د مډالونو په ګټلو سره موږ ټولو ته خوښي راکړه. دغه مډالونه یوازې د ورزشکارانو او د سپورت ریاست لپاره نه دي، بلکې د هیواد په ټولو توکمونو او د هیواد په ټولو خلکو پورې اړه لري.
ورپسې د هېواد د تکواندو فدراسیون رئیس ډاکټر نجیب الله سکندر وینا وکړه او د اسیایي المپیک په سیالیو کې د مډال ګټونکو لوبغاړو د هڅونې او تشویق په برخه کې د ورزش ریاست له مشرتابه پلاوي څخه مننه وکړه، چې ورزشکارانو ته یې د زړه له کومې مبارکي ورکړه.
ښاغلي سکندر وویل: دا پروګرام د ورزشکارانو د روحیې لوړولو لپاره خورا ګټور او ارزښتناک دی ځکه چې ورزشکاران د ځان او نورو په اړه فکر کوي او وایي چې د ورزش ریاست د ورزش په ټولو برخو کې د ورزشکارانو ملاتړ او ستاینه کوي. ښاغلي سکندر زیاته کړه: مسؤولین باید نه یوازې د ورزشکارانو مالي ملاتړ ته، بلکې د ورزشکارانو مالي ملاتړ ته هم پام وکړي، ځکه چې ورزشکاران یوه غریبه طبقه ده او په جدي توګه مالي ملاتړ ته اړتیا لري.
هغه زياته کړه، همدا ورزشکاران دي چې د هېواد لپاره وياړونه ګټي او په بهرنيو ورزشي ډګرونو کې د افغانستان استازيتوب کوي.
د دغه پروګرام په ترڅ کې د هېواد د ووشو فدراسيون تخنيکي او مسلکي مرستيال احسان احمد کړوخېل خبرې وکړې او ويې ويل: دغو ورزشکارانو نه يوازې هېواد ته د ورزش، بلکې د اخلاقو، تګلارې، ايماندارۍ او ايمان مډالونه هم راوړي دي. ښاغلي کړوخېل وویل: په دې نړیوال ورزشي پروګرام کې هغو هېوادونو ګډون کړی و، چې زموږ د هېواد او ورزشکارانو په پرتله د سپورت په ډګر کې لوړ مقام لري، خو تر اوسه یې هېڅ مډال نه دی ګټلی، زموږ د هېواد ورزشکارانو له لږو امکاناتو او اسانتیاوو سره د هېوادوالو د دعا او د سپورت ریاست د ملاتړ په مټ ډیر مډالونه ګټلي دي.
د پروګرام په پای کې د اسیایي المپیک سیالیو د ووشو مډال ګټونکي محمد خالد هوتک د ورزشکارانو په استازیتوب خبرې وکړې او دې سیالیو ته د چمتووالي او څرنګوالي په اړه یې معلومات ورکړل او د ورزش له ریاست څخه یې د مالي او معنوي مرستو غوښتنه وکړه .
د اسيايي المپيک سيالۍ د چين په هانګ ژو ښار کې د ٤٥ اسيايي هېوادونو د ۴۰ ورزشي رشتو د ١٢ زره ٥٠٠ ورزشکارانو په ګډون روانې دي چې له افغانستان څخه د ١٥ ورزشي رشتو ٨٠ تنو ورزشکارانو ګډون کړی چې په تکواندو کې د محسن رضايي او په ووشو کې د محمد خالد هوتک اومحمد نصرت حبیبي له لوري د برونزو مډالونه ترلاسه کړل.
