غور کې د ويلچر باسکټبال سيالۍ د انجمن لوبډلې په اتلولۍ پای ته ورسېدې

د غور ولايت د بدني روزنې او ورزش امريت اړوند د ويلچر باسکټبال فدراسيون د استازولۍ له لوري د ياد ولايت په مرکزي جمنازيوم کې د څلورو لوبډلو ترمنځ د ويلچر باسکټبال سيالۍ، چې يوه اوونۍ مخکې پيل شوې وې د انجمن لوبډلې په اتلولۍ پای ته ورسېدې.

دغه سیالۍ، چې د غوره لوبغاړو موندلو په موخه پيل شوې وې، په پايلوبه کې انجمن لوبډلې خپلې سيالې وحدت لوبډلې ته د ۲۶ پر ۱۹ امتيازونو په توپير ماتې ورکړه او اتلولي يې په خپل نوم کړه او همدارنگه وحدت او غور جام لوبډلو په ترتيب سره دويم او درېيم مقام ترلاسه کړ.

د يادولو وړ ده، چې د دغو سياليو په پای کې غوره لوبډلو او لوبغاړو ته کپونه، مډالونه او ستاينليکونه ورکړل شول.