غزني؛ ګیرو ولسوالۍ کې د ١٤ لوبډلو ترمنځ د ټېپ بال کرکټ سیالۍ پای ته ورسېدې
د غزني ولایت د بدني روزنې او ورزش آمریت اړوند د ټېپ بال کرکټ فدراسیون د استازولي له لوري د ياد ولايت په ګیرو ولسوالۍ کې د ١٤ لوبډلو ترمنځ د ټېپ بال کرکټ سیالۍ د باتور بازانو لوبډلې په اتلولي پای ته ورسېدې.
د یادو سیالیو پایلوبه د باتور بازانو او ډیسي لوبډلو ترمنځ ترسره شوه. د لوبې پچه باتور بازانو لوبډلې وګټله او لومړی یې توپ وهنه وکړه چې په ټاکلو ١٢ اورونو کې د خپلو شپږو لوبغاړو په له لاسه ورکولو سره خپلې سیالې لوبډلې ته د ١٤٤ منډو هدف وټاکه. ډیسي لوبډلې د هدف په تعقیب کې د خپلو ټولو لوبغاړو په له لاسه ورکولو سره ١١٤ منډې وکړې او لوبه یې د ٢٩ منډو په توپیر باتور بازانو لوبډلې ته وبایلله.
دا سیالۍ د ټاپي پروژې په ویاړ ترسره شوې چې ٤٥ ورځې یې دوام وکړ او په پای کې اتلې لوبډلې ته د اتلولي جام او غوره لوبغاړو ته چمتو شوې ډالۍ ورکړل شوې.
