غزني؛ واغظ ولسوالۍ کې د شپږو لوبډلو ترمنځ د فوټسال سیالۍ د بلبل لوبډلې په اتلولۍ پای ته ورسېدې
د غزني ولایت د بدني روزنې او ورزش امریت له لوري د یاد ولایت د واغظ ولسوالۍ له بېلا بېلو کلیو د شپږو لوبډلو ترمنځ د فوټسال سیالۍ، چې ۱۴ ورځې وړاندې پیل شوې وې د بلبل لوبډلې په اتلولۍ پای ته ورسېدې.
د دغو سیالیو پایلوبه د بلبل او اتحاد لوبډلو ترمنځ ترسره شوه، چې په پایله کې بلبل لوبډلې خپلې سیالې لوبډلې ته د ۱/۰ ګولونو په توپیر ماتې ورکړه او اتلولي یې خپله کړه.
د یادو سیالیو موخه د لوبغاړو ترمنځ یووالی او د فوټسال ورزش ته وده ورکول یاد شوي دي.
هېره دې نه وي چې په پای کې غوره لوبډلې ته د اتلولۍ کپ او غوره لوبغاړو ته مډالونه، ستاینلیکونه او چمتو شوې ډالۍ ورکړل شول.
