غزني؛ جاغوري کې د نښې ویشتنې سیالۍ د اتحاد پاتو په بریا پای ته ورسېدې
د غزني د ورزش امریت له لوري په جاغوري ولسوالۍ کې د ۲۲ لوبډلو ترمنځ په تېږو د نښه ویشتنې سیالۍ، چې له تېرو دوو اوونیو راهیسې پیل شوې وې؛ د اتحاد پاتو په بریا پای ته ورسېدې.
د دې ټورنمنټ په پایلوبه کې د اتحاد پاتو او باغچه انګوري لوبډلو له یو بل سره سیالي وکړه، چې په پایله کې د اتحاد پاتو لوبډلې د ۷-۲ په توپیر سره سیالې لوبډلې ته ماتې ورکړه او اتلولي یې خپله کړه.
د دغو سياليو له ترسره کولو څخه موخه د سيمه ييزو او دوديزو ورزشونو پياوړتيا او وده ده او د ټورنمنټ په پای کې د مسوولينو له خوا غوره لوبډلو ته نغدي جايزې، کپونه او مډالونه هم ورکړل شول.
