سرپل؛ صیاد ولسوالۍ کې د ژمي جام په نوم د فوټبال سیالۍ د خورشید لوبډلې په اتلولۍ پای ته ورسېدې
د سرپل ولایت صیاد ولسوالۍ اړوند په اهوی کلي کې د ۱۸ لوبډلو ترمنځ د ژمني جام په نوم د فوټبال لومړی پړاو سیالۍ، چې یوه میاشت وړاندې پیل شوې وې، د خورشید لوبډلې په اتلولۍ پای ته ورسېدې.
د دغو سیالیو پایلوبه د خورشید او برلیک صیاد لوبډلو ترمنځ ترسره شوه، چې په پایله کې دغه سیالي په ټاکلي وخت کې ۱/۱ مساوي پای ته ورسېده؛ خو خورشید لوبډلې د پینالټي شوټ په وهلو سره د دې سیالیو اتلولي خپله کړه.
د یادو سیالیو موخه د صیاد ولسوالۍ ورزشکارانو ترمنځ یووالی رامنځته کول او د یادې ولسوالۍ د غوره لوبډلې لپاره د غوره لوبغاړو موندل و.
د سیالیو په پای کې غوره لوبډلې ته د اتلولۍ کپ او غوره لوبغاړو ته مډالونه، ستاینلیکونه او جایزې ورکړل شوې.
