د کابل ولايت د ساحلي فوټبال الف ليګ د ۸ لوبډلو په ګډون پيل شو
د کابل ولايت، بدني روزنې او ورزش رياست سره په همغږۍ او د فوټبال ملي فدراسيون په همکارۍ د ساحلي فوټبال کمېټې له لوري له کابل ولايت څخه د ۸ لوبډلو ترمنځ د کابل ساحلي فوټبال «الف» ليګ، د فوټبال ملي فدراسیون د ساحلي فوټبال په لوبغالي کې پيل شو.
په دې سياليو کې به له کابل ولايت څخه ۸ لوبډلې ( زيوري، پامير، توحيد، شمس افتخار، رامين اکاډمي، شاه کلپ، اتحاد لوګر او اتحاد چهاردهي ) د يو بل پر وړاندې د ليګ په بڼه سيالۍ ترسره کړي، چې په پايله کې به يې اتله لوبډله د افغانستان ساحلي فوټبال غوره لیګ راتلونکي پړاو ته لار ومومي.
د دې سياليو پيليزه لوبه د زيوري اکاډمۍ او پامير لوبډلو ترمنځ وشوه، چې لوبه په خپل اصلي وخت کې ۵ ـ ۵ مساوي شوه، خو د لوبې په اضافي وخت کې زيوري اکاډمۍ لوبډلې يو بل ګول ترسره کړ او خپلې سيالې پامير لوبډلې ته يې د ۶ - ۵ ګولونو په توپير ماتې ورکړه او لومړۍ بريا يې خپله کړه.
د ويلو ده، چې دغه سيالۍ له ۷ کلن ځنډ وروسته د المپيک، بدني روزنې او ورزش عمومي رياست او د فوټبال ملي فدراسیون فني او مسلکي مرستيال حافظ احمد جان ځدراڼ، د ساحلي فوټبال کمېټې غړو او ورزشکارانو په شتون کې د ساحلي فوټبال ملي لوبډلې ته د غوره ورزشکارانو موندلو او د ساحلي فوټبال راتلونکي پړاو سياليو ته د غوره لوبډلې موندلو په موخه پيل شوې، چې ۱۴ ورځې به دوام وکړي.
