د پاکستان په کوربهتوب د تکواندو لوبغاړو اته ورځنی سمینار پای ته ورسېدو
د پاکستان په کوربهتوب د دغه هېواد په پېښور ښار کې د تکواندو په (ای ټي ټي اې اېف) سبک کې د لوبغاړو د ظرفیت لوړونې په موخه اته ورځنی سمینار پرون (جمعه، مرغومې ۲۱مه) پای ته ورسېد.
دغه سمینار، د۲۰۰ افغان او پاکستاني لوبغاړو په ګډون د پېښور په سپورت کمپلکس کلب کې د روانې جنوري میاشتې په دریېمه نېټه پیل شوی و، چې د افغانستان په استازولۍ ۵۰ لوبغاړو او د اسیا تکواندو ( ای ټي ټي اې اېف) سبک رییس ګل اعظم ګډون کړی و.
دغه سمینار د تکواندو په یاد سبک کې د لوبغاړو ظرفیت لوړونې او په ایران هېواد کې د تکواندو نړۍوال کپ سیالیو ته د لوبغاړو د چمتووالي په موخه ترسره شو، چې د روان میلادي کال د فېبروري په ۲۶مه نېټه به د ۲۲ هېوادونو تر منځ پیل او د همدې میاشتې تر ۲۸مې به دوام وکړي.
