د ورزش ادارې د دعوت و ارشاد رئيس د بلخ ولايت د سنوکر کلبونو له استازو سره ناسته وکړه
د المپيک، بدني روزنې او ورزش عمومي رياست د دعوت و ارشاد رئيس، مفتي داد محمد بريال عطايي د بلخ ولايت په ورزشي تالار کې د بلخ ولايت د سنوکر کلبونو له استازو سره د اصلاحاتو په موخه ناسته وکړه.
په دغې ناسته کې، د دعوت ارشاد رئيس د ناستې ګډونوالو ته د اصلاحاتي وينا وړاندې کولو ترڅنګ مهم ټکي روښانه کړل او د عملي کولو غوښتنه يې وکړه.
همدارنګه په دې ناسته کې د سنوکر د لوبې د پرمختګ، کلبونو د نظم او انضباط د ټینګښت او د ځوانانو د هڅونې پر اړه مهمې خبرې وشوې او د ګډونوالو له خوا د خپلو وړاندیزونو او نظرونو څرګندونو ترڅنګ د اصلاحاتو د تطبیق لپاره د ګډې همکارۍ ژمنه وشوه.
د يادونې وړ ده ،چې په دې ناسته کې د سنوکر فدراسيون عمومي رئيس محترم وحيد الله اصغري، د بلخ ولايت د سنوکر رئيس محترم نصرت الله معظم، او د بلخ د سنوکر کلبونو ګڼ شمېر مالکانو او استازو ګډون کړی وو.
