د هيواد ۳۴ ولايتونو ورزشي مسؤلينو ته د ورزش د ودې مديريتي سمينار پای ته ورسيد
د المپيک، بدني روزنې او ورزش عمومي رياست اړوند د غونډو په تالار کې د ۳۴ ولايتونو ورزشي ادارو تر سلو زیاتو مسؤلينو ته د ورزش د ودې مديريتي سمينار، چې درې ورځې مخکې پيل شوی و، نن ورځ پای ته ورسید.
د دغه مديريتي سمينار د پای په مراسمو کې د المپيک، بدني روزنې او ورزش عمومي رياست رهبري پلاوي، د ولايتونو رييسانو، امرينو او اداري کارکوونکو ګډون کړی وو.
د ياد سمينار د پای په مراسمو کې د هېواد د ورزش ادارې رييس مولوي احمد الله وثيق وويل: (( د خوښۍ ځای دی، چې د هېواد ۳۴ ولايتونو ورزشي مسؤلينو ته د ورزش د ودې مديريتي سمينار په بريالي توگه پای ته ورسید، هیله لرم دغه سمينار د دوی لپاره گټور تمام شوی وي او په راتلونکي کې د ورزشي چارو د لا ښه والي او پرمختگ په برخو کې ترې گټه واخلي."
ښاغلي وثيق همداراز زياته کړه: د هيواد د ورزش اداره مو تل ترڅنګ ولاړه ده او هڅه به مو وي، چې ستاسو ستونزو ته په وخت رسېدنه وکړو. ښاغلي وثیق ولایتي مسؤلینو ته په خبرو کې زیاته کړه، چې د ورزشکارنو د بدني روزنې ترڅنګ د هغوی فکري او باطني روزنې ته هم پاملرنه وکړئ. ))
د دغو مراسمو په دوام د ولايتونو په استازولۍ د پکتيا ولايت د بدني روزنې او ورزش رييس حافظ نور الرحمن تسکين خبرې وکړې نوموړي وويل: ((د دا ډول سمينارونو دايرول د ورزش د ودې لپاره ډېر مؤثر دي، مونږ په دغو درېوو ورځو کې ډېر څه زده کړل او په راتلونکې کې به د ورزش د لا ښې ودې او پرمختگ په برخو کې ترې گټه واخلو، نوموړي همدا راز په ولايتونو کې د ځينو شته ستونزو په هکله خبرې وکړې او د هېواد د ورزش اداري له رهبري يې وغوښتل، چې د دغو ستونزو د حلولو لپاره چټک گامونه واخلي.))
د يادولو وړ ده، چې په ياد سمينار کې د ورزشي ادارې اړوند بېلابېلې برخې شاملې وې، چې په پای کې د هېواد ورزش اداري رهبرۍ له لوري رييسانو، امرينو او اداري کارکوونکو ته تصدیق پاڼې او ډالۍ هم ورکړل شوې.
